VMRO i thotë PO kryeministrit shqiptar

Larg syve të opinionit publik, të dy partitë maqedonase LSDM dhe VMRO po bëjnë përpjekje për të siguruar numrat për formimin e Qeverisë së re. Pas zgjedhjeve të 15 Korrikut fituese doli LSDM por rezultati është shumë i ngushtë me kundërshtarin e tyre politik që u jep mundësi thuajse të barabarta për të formuar qeverinë. Bashkimi Demokratik për Integrim mbetet partia kryesore në këtë mes.

Një informacion i rëndësishëm vjen rreth kryeministrit shqiptar, kërkesë maksimaliste e Bashkimit Demokratik për Integrim në zgjedhjet e 15 korrikut që për partinë shqiptare ishte edhe një fitore e rradhës në kampin shqiptar.

Burime të TetovaSot bëjnë të ditur se partia maqedonase VMRO-DPMNE e Hristijan Mickovskit i ka thënë PO kryeministrit shqiptar. Informacionet flasin se në një marrëveshje të tillë VMRO është pajtuar me partinë e Ahmetit që dy vite ti jepet kryeministri Bashkimit Demokratik për Integrim dhe dy VMRO-DPMNE-së. Bashkimi Demokratik për Integrim dhe VMRO-DPMNE kanë bashkërisht 59 deputetë ndërsa i duhen edhe dy të tjerë për të formuar Qeverinë e ardhshme ndërsa në këtë mes hyn partia maqedonase “Levica” që ka dy deputetë.