### Fatmir Sejdiu: Nuk jam i gatshëm të rikthehem në postin e Presidentit
Ish-presidenti i Kosovës, Fatmir Sejdiu, ka deklaruar se nuk është i gatshëm të rikthehet në postin e Presidentit të Kosovës, duke mohuar se ka pasur ndonjë komunikim apo diskutim lidhur me një mundësi të tillë.
I pyetur për zërat e fundit në media rreth një rikthimi të mundshëm në krye të shtetit, Sejdiu ka thënë se nuk ka pasur asnjë kontakt për këtë çështje.
“Jo, jo, nuk është për mua, nuk kam kurrfarë komunikimi”, ka deklaruar Sejdiu.
Ai ka shtuar se, në një kuptim më të përgjithshëm, mendon se ka ardhur koha që postin e Presidentit ta marrin figura të tjera.
Deklaratat e tij vijnë në një kohë kur në opinionin publik janë diskutuar emra të ndryshëm në lidhje me postin e Presidentit të Kosovës.
Fatmir Sejdiu ka shërbyer si President i Kosovës nga viti 2006 deri më 2010, ndërsa më 27 shtator 2010 dha dorëheqje nga posti.
