### Takimi Kurti-Hamza përfundon pa marrëveshje, në qendër ligji për Specialen dhe zgjedhja e Presidentit
Bisedimet mes kryeministrit Albin Kurti dhe kryetarit të Partisë Demokratike të Kosovës, Bedri Hamza, për çështjen e Ligjit për Dhomat e Specializuara dhe zgjedhjen e Presidentit të Kosovës kanë hasur në mospajtime lidhur me rendin e procedurave parlamentare.
Sipas burimeve të cituara nga mediat kosovare, gjatë takimit është diskutuar mundësia që projektligji për ndryshimin dhe plotësimin e Ligjit për Dhomat e Specializuara të kalojë fillimisht në lexim të parë, ndërsa më pas Kuvendi të procedojë me zgjedhjen e Presidentit dhe në një fazë të mëvonshme të zhvillohet leximi i dytë i projektligjit.
Kjo formulë, sipas raportimeve, nuk është pranuar nga PDK-ja. Partia e drejtuar nga Bedri Hamza ka insistuar që procedura për ndryshimin e ligjit të përmbyllet para se të përfshihet në procesin e zgjedhjes së Presidentit.
Vetë Hamza ka deklaruar publikisht se për PDK-në prioritet mbetet miratimi i ligjit, ndërsa më pas të diskutohet çështja e Presidentit, nëse arrihet dakordim.
Sipas raportimeve të tjera, PDK-ja nuk ka kërkuar që kandidati për President të jetë domosdoshmërisht nga radhët e saj. Hamza është shprehur i hapur për diskutimin e kandidaturave, por ka kërkuar që procedura për ndryshimin e Ligjit për Dhomat e Specializuara të përfundojë përpara votimit për kreun e shtetit.
Ndërkohë, Qeveria e Kosovës tashmë ka dhënë opinionin e saj lidhur me nismën për ndryshimin e ligjit, duke i hapur rrugë vazhdimit të procedurës parlamentare. Megjithatë, koha në dispozicion mbetet e kufizuar, pasi afati kushtetues për zgjedhjen e Presidentit është 6 tetori.
Për momentin, mbetet e hapur nëse palët do të arrijnë një kompromis për rendin e procedurave dhe nëse Kuvendi do të mund t’i përfundojë në kohë të dyja çështjet.
