### Erling Haaland padit Norwegian Air, në qendër të çështjes një reklamë me flokët e tij
Futbollisti i **Manchester Cityt dhe kombëtares së Norvegjisë, Erling Haaland**, ka ndërmarrë veprime ligjore ndaj kompanisë ajrore **Norwegian Air Shuttle ASA**, lidhur me përdorimin e një elementi karakteristik të pamjes së tij në një reklamë.
Sipas raportimeve të mediave ndërkombëtare, në reklamën e kompanisë ishte përdorur një fotomontazh që i referohej modelit të flokëve të Haalandit, i cili për një kohë të gjatë ka qenë pjesë e pamjes së tij karakteristike.
Reklama, e publikuar gjatë Kupës së Botës, shfaqte një aeroplan me një imazh të frymëzuar nga flokët e futbollistit dhe mbishkrimin: **“Nuk jemi ndjerë kurrë më norvegjezë.”** Postimi më pas është larguar nga platformat e mediave sociale të kompanisë.
Norwegian Air ka shprehur habi për faktin që çështja ka përfunduar në gjykatë. Zëdhënësja e kompanisë, Catharina Solli, tha se postimet ishin pjesë e mbështetjes për kombëtaren norvegjeze dhe ishin frymëzuar nga trendet në rrjetet sociale.
“Është e vështirë për ne të kuptojmë pse përfunduam në gjykatë”, deklaroi Solli, duke shtuar se kompania shpreson për një dialog të arsyeshëm lidhur me çështjen.
Nga ana tjetër, avokati i Haalandit, Thomas Hagen, e sheh rastin ndryshe. Sipas tij, bëhet fjalë për përdorimin pa autorizim të tipareve dalluese të futbollistit në një reklamë që synonte promovimin e biletave të avionit.
Çështja tani pritet të trajtohet në rrugë ligjore, ndërsa mbetet për t’u përcaktuar nga gjykata nëse përdorimi i këtij elementi në reklamë ka shkelur të drejtat e Haalandit.
Haaland është një nga figurat kryesore të futbollit norvegjez. Gjatë Kupës së Botës, ai shënoi shtatë gola për Norvegjinë, e cila arriti deri në çerekfinale.
