### Jack Smith përmend rastin e Hashim Thaçit gjatë dëshmisë në Kongresin amerikan
Ish-prokurori special i SHBA-së, Jack Smith, po dëshmon para Komisionit të Senatit për Gjyqësorin në kuadër të një seance dëgjimore lidhur me hetimet dhe ndjekjet penale që ai ka drejtuar ndaj Donald Trumpit. Seanca po zhvillohet më 29 shtator 2026.
Gjatë pyetjeve të senatorit republikan Eric Schmitt, Smith u pyet nëse gjatë karrierës së tij kishte pasur raste që nuk i kishte fituar. Ai pranoi se kishte pasur edhe raste të tilla.
Më pas, Schmitt e pyeti Smithin edhe për periudhën e tij në Dhomat e Specializuara të Kosovës në Hagë dhe për rastin e ish-presidentit të Kosovës, Hashim Thaçi.
Në përgjigjen e tij, Smith iu referua vendimit të fundit të Dhomave të Specializuara, duke thënë se Thaçi ishte dënuar lidhur me torturën e më shumë se 300 personave dhe vrasjen e 96 personave.
Sipas aktgjykimit të shpallur më 16 shtator 2026, Trupi Gjykues i Dhomave të Specializuara gjeti Hashim Thaçin, Kadri Veselin, Rexhep Selimin dhe Jakup Krasniqin penalisht përgjegjës për krime lufte, përfshirë ndalimin arbitrar të 385 personave, trajtimin mizor të 49 personave, torturën e 303 personave dhe vrasjen e 96 personave. Thaçi u dënua me 25 vjet burgim.
Në të njëjtën kohë, gjykata i shpalli të pandehurit të pafajshëm për akuzat për krime kundër njerëzimit dhe për disa incidente të tjera të krimeve të luftës. Vendimi i shkallës së parë mund të ankimohet.
Gjatë seancës në SHBA, Schmitt e pyeti gjithashtu Smithin nëse angazhimi i tij në rastin e Hagës kishte qenë një mënyrë për t’iu kundërvënë Donald Trumpit. Smith e mohoi këtë.
Dëshmia e Smithit në Senat po zhvillohet në një klimë të përplasjes politike rreth mënyrës se si ai ka ushtruar funksionin e tij si prokuror special dhe hetimeve të mëparshme ndaj Trumpit. Republikanët kanë ngritur akuza për keqpërdorim të autoritetit, ndërsa Smith i ka mbrojtur veprimet e tij si të bazuara në prova dhe në rregullat e Departamentit të Drejtësisë.
